LAOAG CITY – Dandanin a malpas ti Senate Blue Ribbon Committee ti panagdengngeg mainaig iti maanomalya a flood control projects.
Inbatad ni Senate President Vicente “Tito” Sotto III a posible a maysa wenno dua laengen ti nabatbati a panagdengngeg ti komite iti iregularidad iti nasao a proyekto.
Inlawlawag ni Sen. Sotto a kalpasan ti sumaruno nga hearing inton Huebes, Septiembre 25, mabalin nga ag-assessment laengen isuda ken mangisayangkat ti internal meeting imbes a public hearing.
Kunana nga ipaiman ti Senado iti Independent Commission for Infrastructure (ICI) ti imbestigasion kadagiti dadduma pay a personalidad a madakamat idinto nga adda ti main-inaw a gakat a mabalinda nga ilungalong.
Maipalagip nga idi Septiembre 23, naiwayat ti maikalima a panagdengngeg ti Senate Blue Ribbon Committee nga idadauloan ni Sen. Panfilo Lacson mainaig iti flood control anomaly no sadinno a naibutaktak dagiti dadduma a nagan ti dati a Senador, dati a Department of Public Works and Highways official ken dati a kongresista a maipagarup nga agaw-awat ti kickbacks wenno komision manipud kadagiti flood control ken infrastructure projects.
