LAOAG CITY – Nagpanawagan ni Senate Minority Leader Aquilino “Koko” Pimentel III iti gobyerno a paigetan ti pannusa kontra iti reckless driving ken ipatungpal ti road safety iti baet ti ngumatngato a bilang dagiti aksidente iti kalsada.
Inaramid ni Pimentel ti panawagan kalpasan a nangiparuk-at ti datos ti Department of Health (DOH) nga umabot iti 577 road accidents ti napasamak manipod laeng Disyembre 22, 2024 agingga iti Enero 2, 2025.
Inpetteng ti senador a saan a rumbeng nga iyaleng-aleng dagiti aksidente iti kalsada.
Inpaganetget na a kasapulan ti naig-iget a linteg ken nasayàat a pannakaiwanwan na tapno maprotehiran ti umili.
Mainaig iti daytoy, nagpila ni Pimentel ti gakat a Senate Bill No. 1015 a gagem na nga amendaran ti Article 365 of Act No. 3815 wenno ti Revised Penal Code, tapno masolusyunan ti reckless driving Ken ipatungpal ti road safety.
Gagem ti gakat a mapatawan ti nadagdagsen a pannusa dagiti aglablabsing iti linteg trapiko iti pagilian.
Innayon ni Pimentel a napatpateg nga iprayoridad ti kinatalged ken panangsurot iti regulasyon ti trapiko, ken isuro iti publiko ti responsable a kababalin iti panagmaneho.
