LAOAG CITY – Napilaan ti kaso a murder kontra iti suspek a nangtagtagbat a poon metten ti nakatayan ti mismo a kabsat na iti Barangay Quiom iti ciudad ti Batac.
Daytoy ti inbatad ni Police Capt. Angelyn Aguinaldo iti Philippine National Police iti ciudad ti Batac.
Inlawlawag ni Aguinaldo nga idi nakaawat da ti report mainaig iti napasamak a panagtagtagbat iti nasao a barangay ket dagus a napan nagresponde dagiti otoridad kadwa da dagiti kameng ti City Health Office iti ciudad ti Batac.
Kuna na a nadanun dagiti otoridad ti suspek a maysa a senior citizen idinto a nakadasay ti kabsat na a biktima, agtawen ti 49.
Inpakaammo ni Aguinaldo a basar iti ina dagiti agkabsat, adda ti saan da a nagkinnaawatan a nangitunda ti panangtagbat ti suspek iti ulo ti biktima iti namin-ado a daras.
Naitaray ti biktima iti ospital ngem naideklarar a dead on arrival gapu iti kaado dagiti sinagaba na a sugat iti ulo na.
Mainaig iti daytoy, kuna ni Aguinaldo a saan a nakainom ti nasanger wenno nabartek dagiti agkabsat idi napasamak ti krimen, ngem dagitoy ket agpada a nagpasar ti mild stroke iti kallabes isut gapuna nga adda da laeng iti uneg ti pagtaengan da para iti naan-anay a panagpaimbag da.
Iti agdama, nakabalud ti suspek iti Philippine National Police iti ciudad ti Batac.
