LAOAG CITY – Naiyuswat ti simple a selebrasyon iti maika-104 a panagkasangay daydi Pres. Ferdinand Edralin Marcos.
Itay laeng bigat ket naiwayat ti thanksgiving mass iti Immaculate Conception Parish, sinaruno ti panagidaton iti sabsabong iti monumento di Marcos iti nasao a siudad ti Batac.
Gapu iti naiget a restriksyon gubuay ti COVID-19 pandemic, nakidanggay ti pamilia Marcos kadagiti Ilokano iti probinsia ken iti sabali a pagilian babaen iti livestream.
Naipagagangay metten a no madanon ti kasangay daydi Pres. Marcos ket maisayangkat ti medical mission a mangididiaya ti libre a dialysis para kadagiti nakukurapay a pasiente iti Mariano Marcos Memorial Hospital and Medical Center.
Kageddan iti daytoy a selebrasyon, maiyuswat pay ti “career week” para kadagiti Ilocano nga agbirbiruk ti trabaho.
Malaksid iti daytoy, naipaayan pay ti sangkabassit a ragsak dagiti senior citizen babaen iti pannakaipaay ti regalo kadagiti agkasangay a senior citizen manipud Sept. 11 agingga iti 17.
Ti tema ti selebrasyon ita a tawen ket disiplina ken panagkaykaysa rason a kalikagum ti pamilia Marcos nga umaweng manen ti nalatak nga slogan iti administrasyon ni Marcos a “Sa ikauunlad ng bayan, disiplina ang kailangan”.
