LAOAG CITY – Binigbig nga agpadpada da Gov. Cecilia Araneta Marcos ken ni Vice Gov. Matthew Marcos Manotoc ti sports tourism a dakkel a tulong iti benneg ti turismo.
Mainaig iti daytoy, inpaayda ti suportada iti pannakaitandudo ti “shooting range” a masarakan iti ili ti Piddig.
Segun iti gobernador, inlawlawag ni Mr. Ryan Remigio, mangidadaulo iti opisina ni Cong. Ferdinand Alexander “Sandro” Office ditoy Ilocos Norte ken maysa kadagiti kameng ti Philippine Practical Shooting Association a nasurot iti nasao a “shooting range” ti “Olympic platform.”
Inpakaammona a dinaydayaw dagiti nakipartisipar iti naisayangkat iti kaunaan a gundaway iti ili ti Piddig nga “skeet and trap tournament” ti kinapintas ti nasao a “shooting range.”
Inbatadna a naggapu dagiti nakipaset iti nagdumaduma a paset ti pagilian kas iti Cebu, Manila, Bacolod ken dadduma pay a mangipamatmat a maiyannatop laeng nga ad-adda pay a maitandudo.
Daytoy met a banag ti sinarurungan ti bise gobernador a nangibunannag a dagiti “shooters” ket babaknang a kaipapananna a dakkel ti gastosenda iti kaadda dagitoy iti probinsia.
Nupay kasta, kunana a malaksid iti “shooting” ket nasken a maitandudo pay ti “wind surfing” iti ili ti Pagudpud, regatta iti Paoay Lake.
Kunana nga inlungalongnan iti immun-una a gundaway ken ni Mrs. Helen Rose Domingo, Ilocos Norte Sports Development Officer ket adda ti maisayangkat nga “sports event” iti probinsia iti kada bulan wenno uray maminsan man laeng iti kada tallo a bulan.
Mamati ti bise gobernador a kabaelan ti Ilocos Norte ti maaddaan ti innem a dadakkel nga “event” iti sports iti tinawen.
Innayonna a no mapasamak daytoy ket dakkel a makatulong ken mangipaay ti nayon a pamastrek dagiti umili manipud iti benneg ti turismo.
