LAOAG CITY – Napateg a maamoan a dagus dagiti possible a sintomas ti leukemia dagiti ubbing tapno matingiting ken maagasan a nasapsapa.
Daytoy ti inbatad ni Dr. Arden Mae Shiu ti Baguio General Hospital and Medical Center (BGHMC).
Karaman kadagiti rumbeng a mabantayan ket ti nabayag a panaggurigor, panagsaksakit dagiti tultulang, saan unay a makapangan, alisto a mabannog, panagbaba ti timbang, masansan a maimpeksyon, panagpadara ken saan a naipagagangay a litem iti bagi.
Segun ken ni Shiu, maagasan ti leukemia isut gapuna a napateg ti nasapa a panagpakita ken panangtingiting ti doktor no adda dagiti sintomas a mapasaran ti maysa nga ubing.
Kuna na pay a napateg ti panagipauneg kadagiti nasustansya a taraon, umdas a turog ken nasalun-at a panagbiag para iti pakabuklan ti salun-at dagiti ubbing.
Inpakaammo ni Shiu a dagiti naberde a nateng ken dadduma pay a nabaknang iti iron ken makatulong iti panangpatalinaed ti normal a lebel ti hemoglobin, ngem saanna a kayat a sawen a makaliklik dagitoy iti leukemia.
Karaman kadagiti mabalin nga usaren a pagagas no makapasar ti leukemia ket ti chemotherapy, radiotherapy ken bone marrow transplant, depende iti klase ken kondisyon ti pasyente.
Inpakaammo ni Shiu a sakopen ti Z Benefits package ti Philippine Health Insurance Corp. (PhilHealth) ti chemotherapy ke radiotherapy.
Ti bolan ti Setyembre ket maselselebraran kas Leukemia Awareness and Prevention Month.
