LAOAG CITY – Manamnama a maiyestablisar ti “sisterhood relationship” iti nagbaetan ti Ilocos Norte ken ti ili ti General Luna iti probinsia ti Surigao del Norte.
Segun ken ni Bise Gobernador Cecilia Araneta Marcos, interesado dagiti opisial iti nadakamat a lugar kangrunaanna ken ni Mayor Sol Matugas para iti pannakapatibker ti relasyon ti nadakamat nga ili ken ti probinsia.
Mamati ti bise gobernador a maysa daytoy a napintas nga umuna nga addang iti kalikagum a mangipalawa iti Producer to Consumer Program ti Provincial Government of Ilocos Norte iti babaen ti Micro Small and Medium Enterprise Office wenno MSMEO.
Mainaig iti daytoy, inbunannagna a planona nga ilungalong ken ni Gob. Matthew Marcos Manotoc iti pannakabukel ti “sisterhood relationship” dagiti nasao a Local Government Units wenno LGU’s.
Inlawlawagna a napintas ti nadakamat a lugar a pakailakoan dagiti nadumaduma a produkto agrikultura ti Ilocos Norte agsipud ta mapukpukawen dagiti mannalon idiay Siargao.
Kunana a basar iti pannakisarsaritana kadagiti opisial iti nadakamat a lugar, kaykayaten dagiti mannalon ti agmaneho ti van gapu ta dakkel ti mapastrekda iti iti inaldaw gubuay iti kaadu dagiti turista nga agturturong idiay Siargao.
Inpalgakna a gapu iti daytoy ket paspasigen nga aggapgapo iti ruar ti Siargao dagiti nadumaduma a produkto agrikultura a kasapulanda iti inaldaw.
Pakaseknan daytoy, namnamaen ti bise gobernador a maikkan ti gundaway dagiti mannalon ditoy Ilocos Norte a mangilako kadagiti produktoda idiay Siargao kadagiti masungsungad nga aldaw.
