LAOAG CITY – Natiliw ti maysa a soldado ken dua a kakadwa na gapu iti iseserrek da ditoy Ilocos Norte nga awan ti umno a dokumento da.
Inbaga ni Mr. Ryan Remigio, ti mangidadaulo iti Border Control iti ili ti Badoc nga adda ti group chat da iti Department of Foreign Affairs (DFA) iti ili ti San Nicolas ket ditoy a naamoan da nga adda ti dua a maipagarop a taga Bohol a mapan mangala ti pasaporte na.
Gapu iti daytoy, nasdaaw da Remigio no apay ken kasanu a nakalusot dagiti maseknan isut gapuna a pinagsubli da dagitoy iti border control.
Inbatad na nga iti pananginterview da kadagiti maseknan ket saan nga agsusurot ken agpapada ti inbagbaga da no sadinno a naibaga ti dua nga aggapo da idiay Bohol, nageroplano da a napan iti Metro Manila ken napan da iti Ilocos Sur idinto a ti soldado ket taga ciudad ti Baguio.
Innayon na a basar pay kadagiti maseknan, nagtalinaed da iti Ilocos Sur iti 15 nga aldaw, ken iti panagturong da ditoy probinsya ket naglugan da ti tricycle.
Nupay kasta, naduktalan a dagiti suspek ket adda ti lugan da a Montero a nangisit ken ti army ti nagmaneho.
Gapu iti inaramid dagiti suspek ket napilaan da ti kaso a resistance and disobedience.
