LAOAG CITY – Manarimaanen ti pannakaikkat dagiti spaghetti wires ditoy probinsia babaen kadagiti Telecommunication Company.
Segun ken ni Sangguniang Panlalawigan Member Hanson Chua, basar iti report ken monitorna, adda dagiti nakairugin ken adda met dagiti manarimaan ti panagsukatda kadagiti poste a pakaikabilan dagiti waya.
Mainaig iti daytoy, ginutigotna ti publiko a no adda dagiti makitada nga spaghetti wires ket mabalinda nga ipakaammo nga insigida kadagiti maseknan nangruna inton malpas ti walo a bulan a naited a clearing period.
Inlawlawagna nga adda dagiti nagkiddaw ti at-atiddog pay a clearing period ngem saan a napatgan sipod ta atiddog unay daytoy.
Mangnamnama ni Chua a babaen ti ordinansa nga inaprobaran ti hunta probinsial ket awanen dagiti agproblema kadagiti spaghetti wires a dagitoy ket nagbalin a risgo kadagiti residente ken dagiti motorista.
Kabayatanna, naammoan nga adda dagiti agkidkiddaw kenkuana a ti maysa pay kadagiti maiyimplementar ket ti pannaka-pagmaymaysa dagiti poste ngem kinunana nga in-inot nga adalenda daytoy nupay patienna nga adda ponto daytoy nga arungaing ti publiko.
