LAOAG CITY – Kiniddaw ni Konsehal Derick Lao a masuktan dagiti nakaikabil a plastic barrier iti paset iti sango ti SM ken Buttong Elementary School ditoy siudad ti Laoag.
Daytoy ket kalpasan ti pannakariparna a dagitoy ket saan a malasin nangruna iti rabii no dumalyasat dagiti motorista iti nasao a lugar.
Inbatadna a masapul ti napinpintas wenno nalawlawag a pannakalasin dagiti plastic barrier a nakaikabil ditoy tapno makita a naimbag dagiti lugan.
Inlawlawagna a rumbeng a maikkan ti nalawlawag a silaw dagitoy tapno saan makaitunda iti aniaman a desgrasia.
Kunana a dagiti dadduma a lugan a dumaldalyasat iti nasao a lugar ket madungdungparda dagiti plastic barrier gapu ta saanda a malasin iti kinasipngetna dagiti nakaikabil a plastic barrier.
Kabayatanna, inpakaammo ti Presiding Officer nga adda ti immunan a panagsaritada ken ni Mayor-Elect James Bryan Alcid, Chairman ti Committee on Transportation mainaig iti daytoy a banag.
Innayonna nga adda ti mailatang a pundo iti pannakaikabil ti street lights gapu ta saan nga umdas ti silaw iti dakkel a mall a mangparaniag iti aglawlaw iti nasao a lugar.
