LAOAG CITY – Balligi ti naiyuswat a drug buybust operation iti Barangay Sangladan iti ili ti Paoay a nakatiliwan ti maysa a lalaki.
Naigbig daytoy a ni Mr. William Salinas, ken residente iti nasao a barangay.
Nagatang kenni Salinas ti dua a sachet ti mapapati nga iligal a droga nga agbalor ti dua a ribo a pisos ken dua pay a sachet iti bulsa na.
Naamoan a ti subject ti operasyon ket adda iti regional level ken datin a nagus-usar iti droga.
Inpetteng met ni Salinas a saan a naglako ti droga gapo ta saan na met ngaammo ti pagalaan iti daytoy.
Inadmitir na a dati a nagus-usar iti iligal a droga ngem adda ti uppat wenno lima a tawen a nagsardeng.
Inlawlawag nga idi kalman ket adda ti timmawag kenkuana tapno mapan iti ili ti San Nicolas gapo ta adda ti kaso na mainaig iti panaglabsing na iti linteg trapiko.
Nupay kasta, kunana nga itay bigat kabayatan nga agsadsada ti pagluganan na ket ditoy a naiyuswat ti operasyon ken napoposasan ken napagpakleb.
Inpetteng na nga awan ti kwata na a dua a ribo a pisos gapo ta ti iggem na laeng ket 1500 a pisos nga isu ti binale na iti pagtrabahoan na.
Kumpyansa met daytoy a dumalan iti drug test gapo ta ammo na nga awan ti iligal nga aktibidad na.
Mainaig iti daytoy, kuna met ni Barangay Chairman Joms Quevedo iti nasao a barangay a ti laeng ammo na a trabaho ni Salinas ket maysa a pahinante ken awan unay ti ammo na kenkuana gapo ta saan na unay a makitkita.
Kabayatanna, kuna ni Police Major Eddie Suyat, ti chief of police ti PNP-Paoay nga us-usaren ni Salinas ti panagbalin na a driver tapno agibyahe kadagiti droga ken nabayagen a mamonmonitor daytoy.
Ni Salinas ket Top 1 iti Municipal Level ken karaman iti drug watchlist iti regional level.
