LAOAG CITY – Inlawlawag ni Miss Giwani Silva, ti mangidadaulo ti Vaccination Operation Center ditoy ciudad ti Laoag no apay a saan a nagpila dagiti dua a kapitan a mapan koma ag-booster shot iti Laoag City General Hospital (LCGH) ditoy ciudad.
Inbatad na a dagiti dua a kapitan manipod iti Barangay 1 ken Barangay Bacsil-North ditoy ciudad ket maibilang a Person with Disability (PWD) ken dagitoy ket agdi-dialysis.
Nupay kasta, ado dagiti nagreklamo kalpasan a simmurot dagiti dadduma a kapitan manipod iti Barangay Pila, Barangay Lataag ken Barangay Mangato-B ditoy ciudad.
Gapu iti daytoy, kuna ni Silva a saan a natuloy ti panagbakuna dagiti nasao a kakapitan ken inbalakad na a masapol a sapaen da ti mapan makipila tapno awan ti agbalin a problema.
Immuna iti daytoy, ti reklamo dagiti dadduma a napan nagbakuna kangrunaan na dagiti senior citizens ken masikog ket awan ti priority lane para kadakuada.
