LAOAG CITY – Naisadsad ti maysa a barko nga MV MSCI 1 a nangiwayat ti emergency beaching iti kabaybayan iti Barangay La Virgen Milagrosa iti ili ti Badoc.
Segun ken ni ENSIGN Aaron Paul Tiangco, Deputy Commander ti Philippine Coast Guard, adda ti karga ti barko a gravel stones ken adda ti nakalugan a 15 a crew member iti daytoy.
Inbatadna a basar iti kapitan ti barko kadakuada nga inbabada pay laeng dagiti crew para iti kinatalged dagitoy idinto a nagtalinaed ti tallo nga opisial a nakalugan tapno bantayan ti kasasaad ti barko ken siguradoen ti seguridad daytoy.
Inlawlawagna a nangiwayatda dagiti addang tapno maprotektaran ti marine environment kas ti panangikabil ti oil spill boom tapno saan nga agwaras ti langis ken mapaalisto ti pannakaikkat wenno refloating ti barko.
Kunana nga aggapu ti nasao a barko iti pantalan iti ili ti Currimao nga agturong idiay Cagayan.
Innayonna a naisadsad ti barko kalpasan a naaddaan ti problema ti generator daytoy agingga a naiyanod gapu iti napigsa ken dadakkel a dalluyong.
Naammoan a saan a napintas ti sasaaden ti panawen idi napasamak ti pannakaisadsad ti barko.
Mainaig iti daytoy, inpakaammo ni Barangay Kagawad Jhysie Mar Yadao a dakkel ti epektona kadagiti pasdek negosio ti pannakaisadsad ti barko gapu ta saan pay laeng a maipalubos ti panagdidigos dagiti bisita ken turista iti baybay.
Malaksid iti daytoy, inpettengna a naapektaran pay ti pagsapulan dagiti sumagmamano a mangngalap iti lugar no sadinno a nagsardeng ti panagkalapda gapu iti naiwaras a langis iti kabaybayan.
Kabayatanna, naammoan a ti barko ket kukua ti maysa a kompania nga addaan ti business address idiay Santa Barbara, Pangasinan.
