LAOAG CITY – Exempted manipud iti buis dagiti sumagmamano nga agas para iti cancer, diabetes ken mental health.
Daytoy ket sumagmamano nga aldaw kalpasan a napirmaan ti CREATE MORE Act.
Immunan nga inyendorso ti Food and Drugs Administration (FDA) ti Value Added Tax exemption iti 10 a kanayonan a medisina a mabenepisiaran iti minilyon a Pilipino a makapaspasar ti health condition.
Karaman kadagiti agas nga exempted ket ti 2 medisina iti Cancer (Degareli & Tremelimumab), 2 iti Diabetes (Sitagliptin ken Linagliptin) ken 3 para iti mental illness (Clomipramine Hydrochloride, Chlorpromazine ken Midazolam).
Naammoan a ti nasao a VAT exemption dagiti agas ket nagbalin nga epektibo dagus iti pannaka-isyu ti Food and Drug Administration advisory idi Nobiembre 22 ken naipublikar idi kalman, Nobiembre 26.
Kabayatanna, ti sakit a cancer, diabetes ken hypertension ket kangrunaan a rason ti pannakatay ditoy Pilipinas a nangina ti agas para iti daytoy isu nga agbalbalin a lapped para kadagiti marigrigat a makapaspasar kadagiti nasao a sakit tapno gumatang ti agas.
