LAOAG CITY – Balligi a naisayangkat ti sumagmamano nga aktibidad kagiddan ti Pride Month ditoy siudad ti Laoag.
Segun ken ni Mrs. Janet Retamal, mangidadaulo ti City Population and Development Office ditoy siudad, immunan a naiyuswat ti rainbow run nga inatendaran dagiti atleta ken dagiti kameng ti Lesbian, Gay, Bisexual, Transgender, and Queer wenno LGBTQ Community.
Inbatadna a naisayangkat ti Alistolympics a nakaitampokan dagiti ay-ayam iti basketball, volleyball ken dance sports.
Inlawlawagna a nakikoordinarda kadagiti barangay tapno ad-adda a maitandudo dagiti programa dagiti adda iti LGBTQ Community.
Kunana nga adda pay ti nabukel a maysa a dakkel a grupo a naawagan kas LGBTQ Pilipinas – Laoag City Chapter.
Innayonna nga adda ti maipaay a pammigbig kadagiti kameng ti LGBTQ Community a nangipaay ti pammadayaw ditoy siudad ti Laoag.
