LAOAG CITY – Naiget a naglikudan ni Senate President Tito Sotto III dagiti alegasion iti naipila a petision kontra kenkuana ni Atty. Ferdinand Topacio ken dadduma pay nga abugado.
Daytoy ket mainaig iti inpila ti Korte Suprema a petition for indirect contempt kontra ken ni Sotto gapu iti maipagarup a limmabes daytoy iti “legitimate commentary” kalpasan nga indeklarar ti Supreme Court nga unconstitutional dagiti articles of impeachment nga inpila ti Kamara kontra ken ni Vice President Sara Duterte.
Inlawlawag ni Sotto, iti babaen ti Rule 71 ti rules of court, makuna laeng nga indirect contempt no daytoy ket inaramid iti ruar ti korte a direkta a manglaplapped, mangperperdi ken mangpadpadakes iti administrasion ti hustisia.
Inpaganetgetna a ti simple a panangipeksa iti panangkontra iti desision ti korte ket saan a maibilang nga indirect contempt.
Insubli ni Sotto ken ni Topacio a kas maysa nga abugado ket ammona dagitoy gapu ta isuna mismo ket adun ti inrakurakna iti publiko a kritisismo iti nagbalin a desision ti korte a saan a pabor kadagiti klientena.
Immunan nga inbatad ni Sotto a ti petision kontra kenkuana ket awan ti legal wenno factual basis ken agpapada a publicity stunt laeng.
