LAOAG CITY – Saan nga aglemmeng imbes ket sangoen ti kaso!
Daytoy ti panawagan ti Malacañang kadagiti dati ken agdama nga opisial ti gobierno nga innaganan ti International Criminal Court a maipagarup a kakunsabo iti nadara a war on drugs ni dati a Presidente Rodrigo Duterte.
Inbatad ni Palace Press Officer ken Presidential Communications Officer Usec. Claire Castro nga awan ti rason tapno aglemmeng no awan ti basol gapu ta ad-adda nga agatap ti gobierno kontra kadakuada.
Iti baet daytoy, inlawlawag ti Malacañang nga awan pay ti makitkita a rason ti gobierno tapno paigetan wenno bantayan dagiti nainaganan gapu ta awan pay ti inparuk-at nga arrest warrant ti International Criminal Court.
Kabayatanna, kinontra ti Palasyo iti pammabalaw ti PDP-Laban a maipagarup nga us-usaren ti administrasion ti isyu iti International Criminal Court tapno iyaw-awan ti atension ti publiko iti flood control scandal.
Kunana a saan a maibilang a diversionary tactics ti nasao a banag gapu ta maipagarup a nabayagen a naipila ti kaso iti International Criminal Court sakbay pay a nagtugaw iti puesto ni Presidente Ferdinand Marcos Jr.
