LAOAG CITY – Naipaayan ti sumuro 3,300 a mannalon ti nagduduma nga agricultural inputs ditoy siudad ti Laoag.
Dagitoy ket pakairamanan ti abono, pesticide, rice ken corn seeds, coconut seedlings ken nagduduma pay manipud iti Department of Agriculture (DA).
Mainaig iti daytoy, naipaay pay ti seke para kadagiti nadadael a mula dagiti nagduduma a mannalon manipud iti Philippine Crop Insurance Corporation (PCIC).
Ti naipaay ket agdagop iti pakabuklan P11.6M a daytoy ket gapu iti kiddaw ti City Government iti babaen ti liderato ni Mayor James Bryan Alcid ken ti City Agriculture Office.
Impasigurado ni Mayor Alcid ti agtultuloy a pannakaipaay ti pagsayaatan iti benneg ti agrikultura tapno adadda pay nga umado ti produksion.
Innayonna a kalikagum ti administrasion nga ipaayan dagiti agricultural barangays ti mobile solar irrigation system tapno adda sigurado a suplay ti danum iti nasao a siudad.
Kabayatanna, kunana nga ado pay ti programa ken proyekto kadagiti mannalon ken mangngalap ditoy siudad.
