LAOAG CITY – Awan ti birth record ti sumurok 400 a recipients ti confidential funds ti Office of the Vice President (OVP) ken Department of Education (DepEd) nga indauloan ni Vice President Sara Duterte.
Daytoy ti rimmuar iti datos manipud iti Philippine Statistics Authority (PSA) maipanggep iti 677 a nagan nga insubmitir ni Congressman Joel Chua, Chairman ti House Committee on Good Government and Public Accountability, iti Philippine Statistics Authority maipanggep iti maiwaywayat nga imbestigasion iti pananggastos iti confidential funds ti Office of the Vice President ken Department of Education.
Iti nasao a bilang, 200 a recipients met ti confidential funds nga agpapada nga awan ti naganda iti record ti Philippine Statistics Authority.
Ti panangarisit ti Philippine Statistics Authority iti nasao a recipients ti confidential funds ti Office of the Vice President ken Department of Education ket naaramid idi rimmuar iti umuna a rakurak ni Philippine Statistics Authority Undersecretary Claire Dennis Mapa a ti maysa a “Mary Grace Piattos” ken “Kokoy Villamin” a recipient ti Office of the Vice President confidential funds ket awan ti birth records iti Philippine Statistics Authority.
Daytoy a banag ket immunan a naglikudan ni Vice Pres. Duterte ken dinakamatna a ti alegasion iti korapsion ken saan nga umiso a panagusar ti pundo ti opisinana ket maysa a klase ti political persecution.
Maipalagip a pinaayaban ti Kamara ni Vice Pres. Duterte maipanggep iti maipagarup a saan a nainkalintegan a pananggastos ti P612.5 a milyon a confidential funds ti Office of the Vice President.
