LAOAG CITY – Ad-adalen pay laeng ti Department of Budget and Management (DBM) no kasapulan ti supplemental budget tapno masupusupan ti ayuda ken dagiti programa para kadagiti Overseas Filipino Worker (OFW) a naapektaran ti kumarkaro a tension iti Middle East.
Inbatad ni Palace Press Officer Claire Castro a nakailatangen ti gobierno ti nayon a ₱3 bilyon a pundo para iti Department of Migrant Workers (DMW) tapno pundoan ti repatriation ken reintegration dagiti Overseas Filipino Worker.
Inlawlawagna nga aggapu daytoy iti available funds wenno savings ti gobierno iti babaen ti maipatpatungpal a pagannurotan iti panaggastos ti pundo ti gobierno.
Kabayatanna, awan pay ti pinal a desision wenno rakurak ti Malacañang mainaig iti posibilidad nga umutang iti Asian Development Bank para iti nayon a pundo ti gobierno.
