LAOAG CITY – Innagananen ti Federal Bureau of Investigation (FBI) ti nangpaltog ken ni dati a Presidente ti Estados Unidos a ni Donald Trump.
Nabigbig daytoy a ni Thomas Matthew Crooks, agtawen iti 20 ken taga-Bethel Park, Pennsylvania.
Maipalagip a napaltogan ni Trump bayat ti rally idiay Pennsylvania, no sadinno nga apaman ti insidente ket insigida a nagresponde dagiti kameng ti protection officers.
Kuna ti Federal Bureau of Investigation nga ibilangda ti pasamak kas maysa nga assassination attempt.
Nu pay immunan a kinuna dagiti kameng ti pulisya ti Pennsylvania nga awanen ti sabali pay a pangta kalpasan ti pannakapaltog, ket naiget latta ti monitoringda.
Kabayatanna, maipalagip a napaltogan ken natay ti suspek babaen kadagiti opisial ti United States Secret Service.
Malaksid iti suspek ket adda pay ti maysa a bystander ti natay iti pammaltog ken dua ti nasugatan.
Kinumpirmaran met ti Federal Bureau of Investigation a ni Crooks ket armado ken nagpaputok manipud iti ngato nga estruktura a sumagmamano a gasut a metro ti kaadayona iti nakaisayangkatan ti rally.
Iti agdama ket mangisaysayangkat ti ahensya ti naan-anay nga inbestigasyon tapno pormal a maamuan ti pakabigbigan ti suspek.
