LAOAG CITY – Addan ti tallo nga indibidual ti naglabsing iti COMELEC Gun Ban wenno ti COMELEC Resolution No. 11067 sipod nangrugi ti pannakaipatungpal ti election period idi Enero 12.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, dagiti maseknan a naglabsing ket maysa manipud iti ili ti Solsona idinto a dua ti aggapu ditoy siudad ti Laoag.
Inbatadna a ti napasamak iti ili ti Solsona ket maysa a komosion no sadinno nga adda ti narekobre dagiti otoridad a maysa a calibre 45.
Kunana a napilaan ti suspek ti kaso gapu iti panaglabsingna iti Republic Act No. 10591 wenno ti Comprehensive Firearms and Ammunition Regulation Act ken ti COMELEC Resolution No. 11067.
Nupay kasta, inlawlawagna a nakapiyansa ti suspek ti sangapulo a ribu a pisos para iti temporario a pannakawaya-wayana.
Kabayatanna, inpakaammo ti pannakangiwat ti Ilocos Norte Police Provincial Office a ti maysa met a naglabsing ket gapu iti komosion idinto a ti maysa pay ket ti natiliw iti Gilbert Bridge ditoy siudad ti Laoag.
