LAOAG CITY – Inbatad ni Police Lt. Col. Amador Quiocho, ti chief of police ditoy ciudad ti Laoag nga adda ti ipatungpal da a temporaryo a traffic scheme ditoy ciudad mangrugi intono bigat, Marso 28.
Daytoy ket kalpasan a naobserbaran da nga ado latta dagiti lugan nga agdalyasat iti Rizal Street ken Bonifacio St. ditoy ciudad.
Inlawlawag na a mangrugi ita nga aldaw ket ‘One Way’ laengen iti Rizal Street ken Bonifacio St.
Segun ti opisyal, no aggapo iti ili ti Sarrat ket deretso a pagdalyasatan iti Rizal St. idinto a no agpadayan ket magna iti Bonifacio St.
Kabayatanna, inbatad ni Quiocho a masapol a malimitaran koma dagiti aggapo iti sabali a lugar nga umay ditoy ciudad ti Laoag tapno saan nga aggiinnakar no bilang adda ti agpositibo ti coronavirus ditoy probinsya.
Kuna na nga addan ti plan-planwen da tapno malimitaran ti bilang dagiti umay ditoy ciudad nga aggapo kadagiti kabangibang nga ili ditoy probinsya.
Innayon na nga inrekomendar na payen ken ni Mayor Michael Marcos-Keon nga adda koma ti maestablisar a tiendaan iti kada barangay tapno maliklikan ti panagdudupudop iti sentro ti ciudad.
Maragsakan ni Quiocho gapu ta inaprubaran a dagus daytoy ti mayor ngem saanna a masigurado no maiyimplementar a dagus daytoy.
