LAOAG CITY – Kinarit ni Defense Secretary Gilberto Teodoro Jr. dagiti opisial ti gobierno a kumankanunong iti takder ti China iti West Philippine Sea (WPS) nga agikkat lattan dagitoy iti puesto.
Iti baet ti impeachment proceedings, inpetteng ni Teodoro a kuwestionable ti takder dagiti opisial nga agkedkedked a sumurot iti pagannurotan ti pagilian mainaig iti West Philippine Sea.
Inlawlawagna a responsibilidad ti amin nga opisial nga ilaban ti Konstitusion ken linteg ti Pilipinas.
Inpalagip ti sekretario a paset ti pammilin dagiti opisial ti panangilaban iti West Philippine Sea a bigbigbigen iti babaen ti Baselines Act ken Administrative Order No. 29.
Kunana a no mamati ti maysa nga opisial a saan nga umno wenno ilegal ti takder ti gobierno, mabalin daytoy a kwestionaren iti Korte Suprema.
Nupay kasta, no saanda a suportaran ti maipatpatungpal a pagannurotan kabayatan nga adda iti serbisio, nasaysayaat laengen nga agikkat dagitoy.
