LAOAG CITY – Balligi a naarestar dagiti otoridad ti maibilang kas Top 2 Most Wanted ditoy siudad ti Laoag babaen ti naiparuk-at a warrant of arrest.
Nabigbig ti suspek nga agtawen 24, addaan ti live-in partner ken residente iti Brgy. 7-B, ditoy siudad.
Basar ti impormasion, naarestar ti akusado babaen ti bileg ti warrant of arrest nga inparuk-at ni Presiding Judge Johnson Valin Padre ti RTC Branch 13 ditoy siudad.
Mainaig iti daytoy, sumangsango ti suspek iti kaso nga Attempted Murder ken narekomendaran daytoy nga agpiansa iti P120,000 para iti temporario a pannakawayawayana.
Kabayatanna, nagtalinaed ti akusado iti kuerpo ti Philippine National Police ditoy siudad ken manamnama a maidatag iti korte a naggapuan ti warrant of arrest.
