LAOAG CITY – Balligi a naarestar ti Philippine National Police ditoy ciudad ti Laoag ken Ilocos Norte Police Provincial Office ti maibilang a Top 2 Most Wanted Person ditoy ciudad.
Nabigbig ti akusado nga agtawen ti 53, naasawaan, dati nga empleado iti lokal a gobierno ken residente iti Brgy. 50 Buttong ditoy ciudad.
Naarestar ti akusado babaen iti bileg ti warrant of arrest nga inparuk-at ni Judge Francisco Roberto Dauz Quilala iti RTC, Branch 14, ditoy siudad idi Agosto 20, 2024.
Sumangsango ti akusado iti kaso a panagsalungasing COMELEC Resolution No. 9561-A wenno Resolution No. 9608 (Gun Ban).
Nammoan a immunan a naibalud ti akusado idi kallabes gapu iti panagsalungasingna iti Gun Ban idi tawen 2013 nga inreklamo ti dati nga opisial ti loka a gobierno ditoy ciudad.
Kabayatanna, natiliw ti akusado iti Brgy. 50, Buttong ditoy ciudad ken manamnama a maidatag iti korte a naggapuan ti warrant of arrest.
Iti agdama, manamnama a maibalud ti akusado iti Bureau of Jail Management and Penology ditoy ciudad ti Laoag.
