LAOAG CITY – Plano ni Agriculture Secretary Francisco Tiu Laurel Jr. nga iyalud-od ti trial period para iti P29 iti kada kilo a rice program ti gobierno kadagiti vulnerable sectors iti maysa a tawen.
Gagem daytoy a maaddaan ti umdas a panawen a makakalap kadagiti datos tapno agbalin a sustainable ti nasao nga addang.
Maipalagip nga inrubuat ti Department of Agriculture (DA) ti “large-scale” trial ti panaglako ti daan a buffer rice stock ti National Food Authority (NFA) kadagiti 10 a Kadiwa sites iti umuna a paset ti bulan.
Naammoan a ti P29 iti kada kilo ti bagas ket para laeng kadagiti benepisiario ti 4Ps, senior citizens, persons with disabilities, solo parents ken indigenous people kadagiti 10 a Kadiwa sites idiay Manila ken Bulacan tunggal Biernes, Sabado ken Domingo.
Mainaig iti daytoy, mabalin a gumatang ti kada benepisiario ti agingga 10 a kilo ti bagas iti kada bulan manipud kadagiti Kadiwa centers.
Kabayatanna, manamnama nga iyalud-od met ti Department of Agriculture ti P29 iti kada kilo a rice program kadagiti lugar iti ruar ti Luzon inton Agosto wenno Setiembre ken kadagiti amin a 1,500 a munisipalidad iti pagilian.
