LAOAG CITY – Nagdinnungpar ti truck ken motorsiklo iti Barangay 18, San Pedro iti ili ti San Nicolas.
Nabigbig ti nangiturong ti Isuzu Yellow Truck wity nga addaan ti trailer Hi-bed truck a ni Leslie Acantilado, agtawen ti 51, naasawaan ken residente idiay Sanchez Mira, Cagayan idinto a ti driver ti motorsiklo a Rusi ket ni Jaymark Pascua, agtawen ti 20, awanan asawa, tubo idiay Sta. Praxedes, Centro Uno, Cagayan ngem agdama nga agnanaed iti Barangay 23 iti ili ti San Nicolas.
Segun ken ni P/Cpt. Sygman Benigno, Hepe ti San Nicolas Municipal Police Station, kabayatan a dumaldalyasat ti truck iti national highway nga agturong nga agpa-abagatan ket nag-overtake daytoy iti akinkannigid a kalsada a nangitunda ti panagdinnuparda iti sumungsungad a nakamotorsiklo.
Gapu iti daytoy, nagsagaba ti sugat iti nagduduma a paset ti bagi ti nakamotorsiklo nga insigida a naitaray iti Mariano Marcos Memorial Hospital and Medical Center iti siudad ti Batac para iti pannakaagasna ngem naideklarar a dead on arrival babaen ti attending physician daytoy.
Inbatadna a basar iti inwayatda nga imbestigasion, rumrummuar a basol ti driver ti truck gapu ta immagaw daytoy ti linya ti kalsada.
Inlawlawagna a saan a nabartek dagiti dua a maseknan a driver idi napasamak ti disgrasia no sadinno a nakasuot ti protective helmet ti nakamotorsiklo.
Innayonna a manarimaan ti pannakaiproseso ti pannakaipila ti kaso a Reckless Imprudence Resulting in Homicide kontra iti driver ti truck.
