LAOAG CITY – Kinumpirmarn ni Police Lt. Melvin Trinidad, deputy chief of police ti PNP Bacarra a pimmusay ti maysa nga ubing nga agtawen ti siyam kalpasan a natudok iti nagputulan ti poon ti ipil-ipil manipud iti nagulian na a poon ti papaya.
Kuna na a bigat a napasamak ti pannakatennag ti ubing ngem naamuan da laeng iti malem iti Brgy. Tubburan iti ili ti Bacarra babaen ti maysa a concerned citizen.
Segun kenni Trinidad, napan immuli ti ubing iti papaya, kadua na ti agtawen ti siyam a kabagyan na, tapno agala ti bunga a paglaok iti sidaen da a tinola.
Maipagarup a naigalis ti biktima bayat iti pananguli na ti poon ti papaya nga agtayag iti 12 agingga iti 15 a kadapan rason a naregreg ken natudok ti akin kannigid a paset ti barukong na babaen ti nagputolan ti ipil-ipil.
Naitaray ti biktima iti Bacarra Medical Center ken naiyakar iti Gov. Roque Ablan Sr. Memorial Hospital ditoy siudad ti Laoag ngem pimmusay bayat ti pannakataming na.
Innayon na a nagtudtudo iti ili ti Bacarra idi kalman rason a nagalis ti aglawlaw kas iti poon ti papaya a nagulian ti biktima.
