LAOAG CITY – Umabot iti nasurok a 50 a Micro Small and Medium Enterprises ti probinsia ti maikkan ti gundaway a makipaset iti Producer to Consumer Program idiay San Juan ken Quezon City.
Daytoy ti inpakaammo ni Mrs. Elma Gabriel, ti mangidadaulo ti Micro Small and Medium Enterprises Office ti gobrieno probinsial a dagiti local producers ken mannalon ket manamnama nga agturong idiay San Juan ken Quezon City tapno mailako dagiti nagduduma a lokal a produkto ditoy probinsia.
Kunana a babaen iti daytoy ket maitampok dagiti nagduduma a produkto ditoy probinsia kas kadagiti longganisa, bagnet ken pakaramanan dagiti prutas ken natnateng.
Malaksid iti daytoy, inpalgakna a dakkel daytoy nga oportunidad tapno maiparaman kadadagiti dadduma nga indibidual dagiti agkakaimas a produkto ti Ilocos Norte.
Kabayatanna, maiyuswat met ti nasao nga aktibidad inton Marso 18 agingga 22 no sadino mamati ni Gabriel a daytoy ket dakkel a pakabenipisiaran para kadagiti negosiate ditoy probinsia.
Ginutigotna dagiti dadduma a kakailian a kayatna iti agaplikar iti nasao a programa tapno mapadasanda iti aglako iti ruar iti probinsia.
Kamaudiananna, babaen ti nadakamat a programa ket maiyasideg manen dagiti produkto manipod Ilocos Norte idiay Quezon City a saan a kasapulan a lumasat kadagiti negosiante wenno middlemen a mangnayon iti pateg dagiti produkto.
