LAOAG CITY – Umaboten iti 93.30% wenno 3,038 barangays ti naideklarar kas drug cleared iti intero a rehiyon uno.
Daytoy ti inrakurak ni Agent Mariepe de Guzman, ti Public Information Officer iti Philippine Drug Enforcement Agency (PDEA) – Region 1.
Inlawlawag ni de Guzman a ti rehiyon uno ket addaan ti 3,267a barangays no sadinno nga adda laengen ti 219 barangays wenno 6.70 percent ti saan a naan-anay a nadalusan seknan iti illegal a droga.
Kuna na nga iti probinsya ti Pangasinan nga addaan ti 1,364 barangays ket 75 barangays wenno 5.50% laengen ti drug affected; La Union nga addaan ti 576 barangay ket addaan laengen ti 20 a barangay wenno 03.47% ti drug affected idinto nga iti probinsya ti Ilocos Sur nga addaan ti 768 barangays ket 75 a barangay wenno 9.77% ti drug affected ken ditoy Ilocos Norte nga addaan ti 559 barangays ken addaan laengen ti 49 barangays wenno 8.77% ti apektado iti illegal a droga.
Mangnamnama ni de Guzman a madalusan amin a barangay iti intero a rehiyon uno seknan iti illegal a droga ita a tawen.
Inadmitir na nga ado a trabaho ken proseso ti maaramid sakbay a maideklarar ti maysa a barangay kas drug cleared.
Mainaig iti daytoy, inlawlawag ni de Guzman a ti maysa a rason no apay nga adda pay dagiti barangay a saan a naideklarar kas drug cleared ket ti kaawan ti naestablisar a Balay-Silangan Reformation Center.
Ti Balay-Silangan ket isu ti pasilidad kadagiti Local Government Units a pakaikabilan dagiti drug personalities imbes nga iti pagbaludan.
