LAOAG CITY – Inpakaammo ni Mr. Jun De Dios, Bombo International News Correspondent idiay Taiwan a saan a kasapulan nga ag-panic buying dagiti umili gapu ta nakasaganan ti kompaniada ken ti gobierno a mangipaay iti tulong uray sakbay a dumteng ti Typhoon Kong-rey wenno Bagyo Leon.
Segun kenkuana, adda dagiti ayuda nga ipaay ti gobieno ken kompanya a pagtartarbrahaunda sakbay iti iduduprak ti bagyo gapu ta maiparitda a rummuaren iti pagtaenganda kabayatan iti iduduprak ti bagyo.
Kinunana a nabalakadan dagitoy a saanen pay a sumrek iti pagubraanda kalpasan a nasuspenson dagiti pasok iti lugarda tapno agsagana iti iduduprak ti Typhoon Kong-rey.
Innayonna nga uray saanda a sumrek iti pagubraanda gapu iti kalamidad, ket baybayadan latta ti kompania ti sueldoda.
Kabayatanna, kunana a nakasaganan ti gobiernoda ken umili kadagiti lugar a mabalin a direkta a maapektaran ti sentro ti bagyo tapnu masigurado ti kinatalged ti tunggal maysa iti agbalin nga epekto ti Typhoon Kong-rey wenno Bagyo Leon.
