LAOAG CITY – Inpangato ti World Health Organization (WHO) iti “very high” ti risgo a kumaro ti outbreak ti Bundibugyo strain ti Ebola iti Democratic Republic of Congo (DRC).
Inbatad ni World Health Organization Director-General Tedros Adhanom Ghebreyesus a nagtalinaed a nangato ti posibilidad nga alisto nga agwaras ti virus iti uneg ti pagilian idinto nga “high” met ti risk iti rehion ken “low” iti sangalubongan a tukad.
Ti Bundibugyo strain ket maysa a klase ti Ebola nga awan pay ti naaprobaran a bakuna wenno agas iti agdama.
Iti kaudian a datos, addan ti 82 a kumpirmado a kaso idiay Congo pakairamanan ti pito a kumpirmado a natay.
Adda ti sumurok 170 a mapagat-atapan a natay ken agarup 750 a suspected cases nga agtultuloy a maim-imbestigaran.
Naammoan nga idiay Uganda ket adda ti dua a kaso a nakumpirmaran manipud kadagiti biahero nga aggapu idiay Congo no sadinno a maysa kadagitoy ket pimmusay.
Basar iti World Health Organization, epektibo idiay Uganda ti naiget a contact tracing ken panangkanselar kadagiti dadakkel a panaguummong tapno malappedan ti panagwaras ti sakit.
