LAOAG CITY – Inpetteng ni Senate Committee on Labor, Employment and Human Resources Development, Chairperson, Sen. Joel Villanueva a nagtalinaed pay laeng a nadagsen a parikot ti pagilian ti unemployment ken underemployment.
Daytoy ket iti baet ti panagbaba ti bilang dagiti awanan ti trabaho iti 3.1% idi Hunio manipud iti dati a 4.1% idi Mayo, 2024.
Inbatadna a nupay bimmassit ti bilang ti unemployed, napateg latta a kitaen ti underemployment a manipud iti 9.9% ket nagbalin a 12.1%.
Kunana a kangrunaan a problema ditoy ti job-skills mismatch ken kalidad ti trabaho no sadinno sumagmamano kadagiti pagtrabahoan ket para iti contractual laeng.
Mainaig iti daytoy, inlawlawagna a nasken nga ikkan ti importansia ti gobierno ti panangsolbar daytoy tapno maipaay ti kasapulan dagiti mangmangged.
Immuna iti daytoy, maysa kadagiti mailunglungalong a linteg iti Senado ti Enterprise-Based Education and Training (EBET) Act a gagem a padur-asen ti kabaelan dagiti mangmangged iti babaen ti training, apprenticeship ken upskilling.
Kabayatanna, adda pay dagiti panawagan met kadagiti employers nga awaten dagiti K-12 graduates iti trabaho, nangruna no kabaelan met dagiti aplikante ti nature ti trabaho a serrekenna.
