LAOAG CITY – Immuli iti 4.9% ti unemployment rate wenno dagiti Pilipino nga awanan trabaho ditoy pagilian idi bulan ti Hunio.
Segun iti Philippine Statistics Authority (PSA), ti nairekord a 4.9% ket katukad ti 2.59 million a Pilipino nga awan trabahona.
Nangatngato daytoy kumparar iti nairekord a 2.5 million jobless Filipinos wenno 4.8% idi Mayo ken nangatngato pay no ikumparar iti 3.7% a nairekord idi naudi a tawen.
Basar iti datos ti nasao nga ahensia, bimmaba ti bilang ti employment iti industria dagiti fishing, aquaculture ken ti manufacturing.
Kabayatanna mainaig iti daytoy, nairekord met ti panagbaba ti bilang dagiti underemployed iti 12.1% idi bulan ti Hunio a katukad ti 6.11 million nga empleado nga agbirbirok ti kanayunan pay a trabaho.
