LAOAG CITY – Dumanon iti 18 nga indibidual ti nairekord a nasugatan iti panag-crash ti Delta Air Lines flight manipud iti Minneapolis – St. Paul International Airport kabayatan ti panag-landing iti Toronto Pearson Airport ita nga aldaw ti Lunes, Pebrero 17, oras idiay Amerika.
Basar iti airline, amin a 80 a naglugan iti pampasahero nga eroplano ket natalged a naisalakan no sadinno a 76 ditoy ket dagiti pasahero idinto nga uppat met ti crew members.
Basar iti Peel Regional Paramedic Services, 18 nga indibidual ti naitaray iti local hospitals, dua a nataengan ken maysa nga ubing ti nagsagaba ti critical injuries.
Awan ti naipadamag a fatalities wenno pimmusay iti insidente.
Iti agdama, saan pay a nalawag a bimmaliktad ti eroplano ngem posible nga adda ti epektona ditoy ti napigsa nga angin.
Basar iti Meteorological Service of Canada, nairekord ti angin a 32 miles per hour (mph) ken kinapaspasna a dumanon ti 40 mph iti nasao nga eropuerto idi napasamak ti plane crash kageddan ti winter storm iti Toronto.
Kabayatanna, madaldalosanen ti wreckage iti eropuerto. Temporario a nasuspenso ti amin a flights iti malem ti Lunes iti Pearson Airport ngem naitultuloy ti departures ken arrivals iti rabii ti Lunes.