LAOAG CITY – Inadmitir ni Barangay Chairman Derek Velasco iti Barangay 40, Buyon iti ili ti Bacarra a nakigtot iti search warrant operation iti pagtaengan na nga inyuswat ti National Bureau of Investigation (NBI) ditoy ciudad ti Laoag.
Segun kenni Velasco, saan na a masigurado no siasinno ti akinkuna iti nakasupot a bala ti M16 rifle a naala iti balay da.
Inbatad na a mabalin a kukua pay laeng daydi ama na dagiti naala a bala.
Inlawlawag na a maysa kadagiti deponent ti search warrant a ni Mr. Chito Duran Visaya ket dati a nagyan iti balay da ken agkadwa da iti daydi ama na ken posible a patyen ti maseknan nga adda pay laeng iti kapitan ti armas.
Naamoan a ti nakaalaan ti supot ti balbala ket ti dati a kwarto ti kapitan ngem iti agdama ket storage room.
Maipalagip a naipalaon iti search warrant a masukimat kuma iti balay ni Velasco ti maysa a baby armalite, maysa a M-16 long armalite, tallo a carbine rifle, uppat a kalibre 45 a paltog Thomson caliber 45 rifle.
Mainaig iti daytoy, kuna ni Atty. Diosdado Araus, head ti NBI-Laoag nga awan ti pakainaigan na iti search warrant operation iti balay ni Barangay Chairman Derek Velasco iti Barangay Buyon iti ili ti Bacarra iti sabali pay a tallo nga operasyon.
Segun kenni Araus, naggigiddan laeng nga inyemplementar da laeng ti search warrant nga inparuk-at ni Executive Judge Mia Joy Oallares-Cawed iti RTC idiay Baguio City.
Naamoan a regular filing ti maipila kontra kenni Velasco.
Kabayatanna, awan met ti komento ti NBI seknan iti nagnegatibo a resulta kadagiti inyuswat da nga operasyon.
