LAOAG CITY – Winaya-wayaanen ti Philippine National Police ti driver ti Florida bus a ni Louie Sardeng y Ramos, agtawen ti 51, naasawaan ken residente iti Barangay Taggat Sur, Claveria, Cagayan kalpasan nga awan pay dagiti napan nakisarita a miembro ti pamilya ti pimmusay a driver ti pick-up a ni Mr. Noel Modesto y Calivoso, Head Nurse iti Rurak Health Unit iti ili ti Bangui ken residente metlaeng iti nadakamat nga ili.
Daytoy ti inpakaammo ni Police Major Jonevale Maramag, ti chief of police iti ili ti Pasuquin.
Kuna ni Maramag a no makadesisyon ti pamilya ti biktima nga agpila ti reklamo ket imbitaran danto manen ti driver ti bus gapu ta nagkari met ti pagpapaayan na a kompanya a nakasagana da a sumango iti pamilya ni Modesto.
Maipalagip a napasamak ti insidente iti kurbaan a paset ti kalsada idi huwebes, Enero 17 ita a tawen kalpasan a nagovertake ti pick-up iti maysa bagun a nagresulta iti panagdinnungpar da iti bus nga addaan ti 43 a pasahero ken agturong koma daytoy iti ciudad ti Baguio manipod iti ciudad ti Tuguegarao.
Gapo iti daytoy, nagsagaba ti nakana a sugat ti driver ti pick-up ken naitaray iti Gov. Roque Ablan Sr. Memorial Hospital ditoy ciudad ti Laoag ngem natay bayat a maag-agasan.
