LAOAG CITY – Inyistorya ni Jennifer Pascua ti naimatangan na a pasamak idi rabii iti balay da iti Barangay Root iti ili ti Dingras mainaig iti panangbagko-bagkong ni Barangay Tanud Chester Manzanillo iti live-in partner na a ni Jay Calasaga y Lanusa, alyas Sultan, agtawen 40, construction worker.
Segun kenkuana, gapu ta marurud a makakitkita ti panaggiinom ti live-in partner na kadwa na da Barangay tanud Mazanillo, Edwin Salvador ken Jason Tamayo ket bimmaba ken nagikkis ti namindua a daras.
Ditoy metten nga inbaga ti suspek nga agsardeng ni Pascua ken nagpangta a tungpa-tungpaen na, kalpasan na ket kwinestyunaran na ti babai no apay a kayat na a pabalud ti asawa na.
Insungbat met ni Pascua a saan a mabuteng a mangpabalud ta live-in partner na.
Inbaga ni Pascua a ditoy met a bimmallaet ti live-in partner na ket nakunana a madi ti naibaga ti suspek a tungpa-tungpaen na ti babai.
Iti panagsubli koman ti biktima iti uneg ti balay da ket maipagarop a kellaat lattan a napan dinanug ti suspek ken iti isusubbot ni Calasaga ket naidaramudom ti barangay tanud.
Kalpasan ti sumagmamano a minutos a panagriri dagiti dua ket nagawid ti suspek ken idi nagsubli ket nagsarita da pay laeng iti biktima ken nagpadespensar da iti tunggal maysa.
Nupay kasta, kuna ni Pascua nga inpagarop na naurnusen ti napasamak ngem nakigtot idi makita na a kinallabay ti suspek ti live-in partner na ken kellaat na lattan a binagko-bagkong.
Innayon na a kalpasan a nabagko-bagkong ti suspek ti biktima ket nagtaray kagiddan ti panangibaga na a naala nan.
Gapu kadagiti sinagaba a sugat ti biktima ket pimmusay sakbay a naidanun iti Dingras District Hospital.
Kabayatanna, inbaga ni Police Major Ryan Retotar ti chief of police iti ili ti Dingras a basar iti imbestigasyon da ket tallo a sugat iti bagi ti sinagaba ti biktima.
Kuna na a ti suspek ket napan nakiinom iti Barangay Saludares ken idi agawid ken nakita na nga aggiinom ti biktima ken dua a kakadwa na iti uneg ti balay da Calasaga isut gapuna a dimmagas manen.
Kas iti nagbalin a palawag ti live-in partner ni Calasaga ket kastoy met ti naamoan iti imbestigasyon ti pulisya.
Kinumpirmaran ni Retotar nga adda dagiti isyu a maibagbaga a pakainanaigan ti Manzanillo ngem ibal-validate da pay laeng.
Inpakaammo ni Retotar a reklamo a murder ti sangwen ti nasao a suspek.
Inpadas ti Bombo Radyo Laoag nga alaen ti kabibiangan ti suspek a nakakustodyar iti agdama iti PNP-Dingras ngem nagkedked daytoy a nagpainterview.
