LAOAG CITY – Naragsak a nakaawiden ditoy Pilipinas ni Ms. Catherine Tagaca Andres a residente iti Brgy. 21 iti ili ti Sarrat ken Overseas Filipino Worker idiay Saudi Arabia a minaltrato ti amona.
Segun kenkuana, saanna a mailadawan ti napalaos a ragsakna a nakasubli daytoyen ditoy pagilian ken naminsan manen a makitana dagiti ay-ayatenna iti biag nga isu ti nangpatibker ti riknana kabayatan ti panangsangona ti napasaranna a dakkel a pannubok.
Inbatadna a saan a nagbalin a nalaka ti kapadasanna kas maysa nga Overseas Filipino Worker iti nasao a pagilian gapu ta natangsit ken dinangran isuna ti amona.
Inlawlawagna a timmalaw daytoy iti pagpapaayanna a pagtaengan gapu ta pabpabasolenda isuna a nagtakaw ti kuarta a 300 riyal banag a naigetna a naglikudan.
Inpettengna nga inpakitana pay iti amona dagiti amin a kagamitanna tapno mapaneknekan nga awan pulos ti innal-alana a kuarta.
Nupay kasta, inpalgakna a saan a mamati ti amona isu a nagbusor daytoy kenkuana agingga a nadangranna isuna.
Malaksid iti daytoy, kunana a naigetda nga inukag dagiti amin a kagamitanna ken kinitada pay ti pribado a paset ti bagina tapno maipasigurado nga awan ti mailibas iti pagtaengan ti amona.
Gapu iti daytoy, inbaga ni Catherine a na-trauma daytoyen iti napasamak kenkuana nangruna ket idi 2018 nga isu ti umuna a panagtrabahona kas OFW idiay met laeng Saudi Arabia ket nadangran manen isuna ti amona gapu iti panagimon.
Mainaig iti daytoy, napanunutanna a saanen nga agsubli iti ballasiw-taaw gapu ta mamati a saanna a gasat nga agtrabaho iti sabali a pagilian.
Innayonna a maawatna ti 20 ribu a pisos manipud iti Overseas Workers Welfare Administration para iti Balik Pinas, Balik Hanapbuhay Livelihood Assistance inton Lunes.
Maipalagip a nakaawid ni Catherine ditoy Pilipinas babaen iti tulong ni Mr. Lawrence Valmonte, Overseas Filipino Worker Adviser idiay Saudi Arabia ken ti awan sarday a panangi-update ti Bombo Radyo iti kasasaad ti nasao nga OFW manipud idi timmalaw iti amona agingga a balligi a nakasublin ditoy pagilian.
Immuna iti daytoy, bimmisita ni Catherine ita nga aldaw ditoy istasion ti Bombo Radyo Laoag tapno personal nga idanon ti panagyamanna kadagiti amin a timmulong kenkuana.
