LAOAG CITY – Inbatad ni Police Major Joseph Baltazar, ti chief of police iti ili ti San Nicolas nga agpapan ita ket saan da pay a nabirukan ti paltog nga inusar ti suspek iti napasamak a pammaltog iti Barangay 11 iti nasao nga ili.
Segun ken ni Baltazar, ti kangrunaan a pagbirbirukan da ket iti karayan a masarakan iti laud ti Barangay 11 iti nasao nga ili gapu ta isu ti maipagarop a nangibellengan ti suspek a ni Jefferson Badua Agustin, agtawen ti 35, taga Brgy. 10 iti nasao nga ili.
Immunan nga inlawlawag ni Baltazar a naamoan da ti lokasyon ti suspek babaen ti tulong dagiti kameng ti Ilocos Norte Police Provincial Office (INPPO) ken ti agtultuloy a pannaki-koordinar da ken ni Barangay Chairman Boyet Agustin iti Barangay 10 iti ili ti San Nicolas.
Inbaga na a nakaawat da ti report nga adda ti suspek iti maysa a paggasolinaan ken mangmangan ket dagus da a nagturong iti lugar.
Naamoan a ni Barangay Chairman Agustin ket uliteg ti nasao a suspek.
Kinumpirmaran pay ni Baltazar nga addan ti dati a susik ti biktima a ni Edwin Martin Jr., taga Brgy. 13 ditoy ciudad ti Laoag ken ti suspek maipanggep ti motor a nangitunda ti napasamak a pammaltog.
Innayon na nga hustisya ti iyik-ikkis ti pamilya ti biktima isut gapuna a pursigido da a maipilaan ti reklamo ti suspek.
Inpakaammo met ni Baltazar a murder ti ipila da babaen iti inquest proceeding kontra iti nasao a suspek.
