LAOAG CITY – Inbatad ni Fire Senior Inspector Ronald Castillo, ti fire marshal ti Bureau of Fire Protection ditoy siudad ti Laoag a nangrugi ti apoy iti altar iti uneg ti pagtaengan a nauram iti Brgy. 51-B Nangalisan ditoy siudad.
Kuna ni Castillo a basar iti panagimbestigar da ket agu-usar ti kuryente dagiti adda iti altar ken dagiti waya ti posible a nalunag.
Inbatad na a malaksid iti daytoy ket naduktalan a ti fuse box iti pagtaengan ket naka-jamper wenno naikkan ti barot nga isu ti ad-adda a nangdegdeg ti uram.
Mainaig iti daytoy, inpakaammo ni Castillo a karaman kadagiti nauram ket dua a kwarto iti nasao a pagtaengan ken dagiti machines nga us-usaren ti maysa a bumalay a napan iti ballasiw taaw iti napalabas a bulan.
Immuna iti daytoy, kuna ti fire marshal immabot iti nakurang a maysa a oras sakbay a naideklara ti fire out.
