LAOAG CITY – Addan ti Persons of Interest ti Philippine National Police seknan iti napasamak a bomb threat iti Mariano Marcos State University iti ciudad ti Batac iti napalabas a tawen.
Daytoy ti inbatad ni Police Lt. Col. Jephre Taccad, ti mangidadaulo ti Provincial Operation Management Unit iti Ilocos Norte Police Provincial Office (INPPO).
Segun ken ni Taccad, ti laeng iyur-uray da iti agdama ket ti agbalin a resulta ti imbestigasyon ti Cybercrime Unit seknan iti napasamak a bomb threat iti nasao nga unibersidad.
Inaramid daytoy ni Taccad kabayatan ti press conference kalpasan ti naiyuswat a supresa a bomb drill iti kapitolyo probinsyal idi miyerkules, Enero 8 ita a tawen.
Maipalagip a gapu iti napasamak a bomb threat iti Mariano Marcos State University iti napalabas a tawen ket nangitunda ti pannaka-kanselar ti klase iti sumagmamano nga aldaw iti nasao a pagadalan.
