LAOAG CITY – Inpakaammo ni Miss Cherry Jean Adena, ti Presidente iti Parents Teachers Association iti Plaridel Elementary School ditoy siudad ti Laoag nga awan kenkuana ti kuarta a bayad para iti Raffle Bonanza.
Segun kenkuana, ti laeng iggemna ket ti premio nga agbalor ti 55 a ribu a pisos nga isu ti bayad dagiti nailako a 2,466 a pedaso a ticket.
Inlawlawagna a ti dadduma a naglakoan ket adda iti Board Director ken ni Mr. Joel Remigio ti Principal ti nasao a pagadalan.
Kunana a dimmalan ti nasayaat a proseso ti nasao nga aktibad ken inaprobaran daytoy ti nasao a Principal.
Inbatadna a ti gagemna daytoy a fund raising ket para iti panangipasdek ti Reading Center ti nadakamat a pagadalan.
Naammoan a dagiti mapangabakan dagiti maseknan ket adda iti 1st prize a 30 a ribu a pisos, 2nd prize a 10 a ribu a pisos, 3rd prize a 5 a ribu a pisos ken adda pay ti lima a consolation prizes a sag-sangaribu a pisos.
Maipalagip a namin-adu a daras a naitantan ti pannakaisayangkat ti Raffle Bonanza.
Immuna iti daytoy, inpalgak ti Principal nga adda amin ti bayad dagiti ticket iti maseknan a Presidente ti Parents Teachers Association.
Kabayatanna, bayat ti pannakaiyuswat ti raffle draw ket adda ti napasamak a panagtakaw no sadino dagiti dadduma a koleksion iti bayad dagiti ticket ket nairaman a natakaw ngem inkari ti Principal a suktanna daytoy.
