LAOAG CITY – Inbatad ni Police Capt. Jonevale Maramag, ti chief of police iti ili ti Marcos nga awan pay ti naestablisar da a motibo iti pannakatay ni George Jesus Domingo, agtawen ti 51, tricycle driver ken agnanaed iti Barangay 1 iti ili ti San Nicolas.
Maipalagip a nakita laengen ti bangkay ni Domingo iti nasulimek a paset ti Barangay Tabucbuc iti ili ti Marcos ket patien dagiti otoridad a naibelleng laeng daytoy iti lugar ken t adda ti sugat iti babaen ti barukong ti biktima ken maipagarop a shotgun ti nausar iti krimen.
Inbaga ni Maramag a basar iti iggem da a CCTV ket nakita a limmabas ti biktima a nakatricycle iti ili ti Marcos ket adda ti mangsarsaruno a motorsiklo nga adda ti dua a nakalubbon.
Nupay kasta, inpasigurado ni Maramag a saan a nagsardeng ti biktima iti ili ti Marcos no di ket nagderetso iti ili ti Banna.
Segun ken ni Maramag, saan da a malasin ti nakalugan iti motorsiklo ken no adda ti karga ti tricycle ti biktima gapu ta adayo ken saan a nalawag isut gapuna nga agpatulong da ti mabalin a mangpalawag ti nasao a CCTV footage.
Inpakaammo na a nabirukan da payen ti sidecar ti motorsiklo ti biktima iti kakaykaywan a paset ti Brgy. Bugasi iti ili ti Banna.
Inpakaammo na a ti nakakitaan ti bangkay ni Domingo ken iti Barangay Bugasi iti ili ti Banna ket agabay laeng ken karayan laeng ti nagbaetan da.
Innayon na nga adda pay ti bassit a kanal iti karayan a mabalin a pagnaan ti motorsiklo.
Naamoan a ti biktima ket agpapautang ti 5-6.
