LAOAG CITY – Naarestaren ken mapilaan ti kaso a murder ti suspek iti nasarakan a bangkay ti maysa a lalaki iti paset ti kabakiran iti Barangay Zamboanga ditoy siudad ti Laoag.
Segun ken ni P/Lt.Col. Ryan Retotar, Hepe ti Laoag City Police Station, ti biktima ket ni Jason Ramos, agtawen ti 36, naasawaan, laborer ken residente iti nasao met laeng a barangay idinto a ti suspek ket maysa a foreman.
Inbatadna a basar iti imbestigasionda, naaramid ti suspek ti krimen gapu iti dati a susikda iti biktima maipanggep iti trabahoda.
Inlawlawagna a kabayatan nga agiinum ti suspek ken ti saksi ket simmangpet ti biktima a saan a nagbayag ket adda ti saan a panagkinnaawatan ti biktima ken suspek agingga a nagbinnara dagitoy.
Kunana a basar iti naiwayat a postmortem examination iti bangkay ti biktima ket adda ti sugat iti rupa, tengnged, barukong, bukut ken buksit daytoy.
Innayonna a ti rason ti pannakatay ti biktima ket gapu iti pannakamalo wenno pannakadangran.
Iti agdama, adda iti pagbaludan ti Laoag City Police Station ti suspek kabayatan a maisagsagana ti kaso a maipila kontra kenkuana.
Maipalagip nga agarup alas nuebe ti bigat idi kalman ket adda ti maysa nga indibidual ti mapan koma mangayo iti nasao a lugar ngem kellaat daytoy a nakigtot idi nakitana ti bangkay ti biktima.
Immuna iti daytoy, agik-ikkis ti hustisia ti ama ti biktima a ni Mr. Marcelo Ramos Jr. gapu iti nakaam-ames a napasamak iti anakna.
