LAOAG CITY – Natiliwen ti suspek ti napasamak a pammaltog idiay Brgy. Binsang, Pasuquin, Ilocos Norte.
Nabigbig daytoy a ni Jeremy Magaoay, construction worker, ken taga Brgy. Natba idiay ili ti Bacarra ken naikamang idiay Brgy. 3 Pasuquin.
Segun kenni Magaoay, inaramid na daytoy gapo ta kellaat nga immovertake dagiti biktima ken maipagarop a pinukka-pukkawan da pay ti suspek ken kinatkatawaan da pay daytoy.
Inlawlawag na a saan na nga intensyon a papatayen dagiti biktima no diket plano na laeng a butbutngen.
Inadmitir ni Magaoay nga adda ti iggem na a kalibre 45 a paltog a nagexpire ti lisensya na ken naipalapal na daytoy iti igid ti kalsada gapo ti nerbyus na kalpasan ti panangpalto-paltog na kadagiti biktima.
Inbatad na nga intugot na ti paltog na gapo ta adda ti pangta ti biag na sipud pay idi naikamang gapo ti utang.
Kabayatanna, inadmitir ti suspek nga addan ti ummuna a napapatay na iti kallabes babaen ti pinangbagkong na.
Innayon ti suspek a nakasagana a sumango iti aniaman a kaso a maipila kontra kenkuana.
Maipalagip a nasugatan dagiti agnagan ti John Lord Abion ken Herman Acoba kalpasan ti nasao a pammaltog.
