LAOAG CITY – Insardengen ti Philippine National Police ti imbestigasyon da mainaig iti pannakapalto-paltog ti dua a lalaki iti Barangay Paltit iti ili ti Badoc iti kallabes.
Daytoy ti inpakaammo ni Police Capt. Edison Pasamonte, ti chief of police iti ili ti Badoc.
Segun ken ni Pasamonte, insardeng dan ti agimbestigar kalpasan a nagsanud ti pamilya dagiti biktima a mangipila ti reklamo kontra kadagiti suspek iti baet nga addan ti person of interest da.
Innayon na nga ammo dagiti pamilya dagiti biktima ti rason ti pannakapapatay da ngem nagkedked da a mangipublikar iti daytoy.
Kuna pay ti chief of police a saan a kayat ti pamilya dagiti biktima ti mairamraman isut gapuna a nagdesisyon da nga agulimek laengen.
Maipalagip nga idi Pebrero ita a tawen, kabayatan ti panagpapa-amyanan dagiti biktima nga isuda Erwin Rondal, residente ti Barangay Napu iti ili ti Badoc ken James Fernandez a residente ti Barangay Bulbulala iti ili ti Pinili a nakalugan ti SUV ket kellaat lattan a pinaltu-paltogan dagiti saan pay a nabigbig a suspek a sumarsaruno kadakuada a nakalugan ti maysa nga Innova nga agmaris ti puraw ken maysa a pick-up nga agmaris ti nangisit.
Inpakaammo ni P/Cpt. Pasamonte, nga adda ti sumurok-kumurang 80 a basyo ti bala ti narekobre dagiti otoridad iti nakapasamakan ti insidente
Segun kenkuana, dagiti nausar a paltog iti insidente ket ti calibre .56 ken calibre .30.
Innayon na a narekobre pay dagiti otoridad iti uneg ti lugan dagiti biktima ti maysa a calibre .56 ken dua a pistol.
