LAOAG CITY – Inbatad ni Mr. Kent Ramil, information officer ti Department of Science and Technology ditoy probinsya nga adda ti sumagmamano nga addang tapno makissayan ti coliform iti Paoay Lake.
Kuna na a babaen iti koordinasyon ti gobierno probinsyal, Department of Science and Technology, local a gobierno iti ili ti Paoay ken dadduma pay a maseknan nga ahensya ket naibunong ti maysa a tonelada ti Vigormin waste water treatment kadagiti establishimento iti aglawlaw ti dan-aw.
Inpakaammo na a partikular ditoy dagiti pasdek ken establishimento nga adda iti 100 meter radius ti Paoay Lake.
Inlawlawag ni Ramil a ti nasao a vigormin waste water treatment ket isu ti maipan iti waste water wenno septic tank tapno madalusan ken maikkat ti coliform sakbay nga agayus iti Paoay Lake.
Immuna iti daytoy, inpakaamo ni Ramil a ti vigormin ket inaramid ti Adamson university ken pinondoan ti Department of Science and Technology.
Kuna na a ti nasao a treatment ket all natural water treatment.
Kabayatanna, inbatad ni Ramil nga iti agdama ket addan ti kanayun a panagdalus dagiti residente kadagiti aglawlaw ti Paoay Lake ken naikkat dagiti dingwen a kanayun nga agrugit, banag a dakkel a nakatulong iti panagbaba ti coliform iti nasao a dan-aw.
Naamoan a ti coli form bacteria ket kangrunaan a makita iti rugit ti ayup wenno tao.
