LAOAG CITY – Inpakaammo ni Vice Mayor Remigio Medrano iti ili ti Sarrat nga agtuloytuloy ti ipapaayna a suporta kadagiti agar aramid ti binakol nga produkto iti nasao nga ili.
Daytpy ket kalpasan nga adda dagiti sumagmamano nga agar-aramid ti binakol a nagriri gapu ta saanda a maipapaayan wenno saanda a makaaw-awat iti tulong manipud iti lokal a gobierno.
Segun kenkuana, no pakaseknan ti pinansial a tulong ket ipapaayna dagitoy babaen kadagiti kooperatiba aglalo iti San Jose Cooperative iti Barangay 20 iti nasao nga ili.
Inlawlawag ni Vice Mayor Medrano a ti rason no apay saan a makaaw-awat ti tulong dagiti indibidual nga agar-arami ti binakol ket gapu ta saanda a nakarehistro ken rumbeng laeng a makikadwa-da kadagiti kooperatiba tapno maipaayanda ti tulong.
Innayonna pay a no paayabanda dagitoy ket saanda a mapan iti munisipio.
Nupay kasta, inpanamnamana a mangkitada iti sabali a wagas tapno maipaayanda dagitoy ti tulong gapu ta daytoy ti kangrunaan a produkto-da ti ili ti Sarrat.
